အမေရိကန်လက်ထောက်နိုင်ငံခြားရေးဝန်ကြီး ကာ့တ် ကမ့်ပ်ဘဲလ် မြန်မာနိုင်ငံရောက်ရှိ

VOA မှ
အမေရိကန်နိုင်ငံခြားရေးဌာန၊ အရှေ့အာရှနဲ့ပစိဖိတ်ဒေသဆိုင်ရာ လက်ထောက်နိုင်ငံခြားရေးဝန်ကြီး မစ္စတာ ကာ့တ် ကမ့်ပ်ဘဲလ် (Kurt Campbell) ဟာ မေလ ၉ ရက်၊ တနင်္ဂနွေနေ့မှာ မြန်မာနိုင်ငံ ရောက်သွားပါပြီ။ နှစ်ရက်ကြာ အခုခရီးစဉ်အတွင်း မြန်မာစစ်အစိုးရတာဝန်ရှိသူတွေနဲ့ရော နေအိမ်အကျယ်ချုပ်ကျနေတဲ့ မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်နဲ့ပါ တွေ့ဆုံမှာဖြစ်ပါတယ်။

မြန်မာနိုင်ငံကိုရောက်သွားပြီးတဲ့နောက် မြန်မာနိုင်ငံခြားရေးဝန်ကြီး ဦးဉာဏ်ဝင်း၊ ပြန်ကြားရေးဝန်ကြီး ဗိုလ်မှူးချုပ်ကျော်ဆန်းတို့နဲ့ နေပြည်တော်မှာ တွေ့ဆုံခဲ့တယ်လို့ သိရပါတယ်။

မြန်မာစစ်အစိုးရကထုတ်ပြန်ထားတဲ့ ရွေးကောက်ပွဲဥပဒေတွေနဲ့ ပတ်သက်လို့ရော၊ အဲဒီကနေတဆင့်ဖြစ်လာတဲ့ နိုင်ငံရေး ၀န်းကျင် အခြေအနေတွေအပေါ်ကိုရော အမေရိကန်က တကယ့်ကို စိုးရိမ်မိတယ်လို့ မြန်မာနိုင်ငံကိုမထွက်ခွာခင် ထိုင်းနိုင်ငံ၊ ဘန်ကောက် လေဆိပ်မှာ တထောက်နားချိန် မစ္စတာကမ့်ပ်ဘဲလ်က သတင်းထောက်တွေကို ပြောခဲ့ပါတယ်။

မစ္စတာကမ့်ပ်ဘဲလ်ကို မြန်မာစစ်အစိုးရ၀န်ကြီးချုပ် ဗိုလ်ချုပ်ကြီးဟောင်းသိန်းစိန်က လက်ခံတွေ့ဆုံဖွယ်မရှိဘူးလို့ မြန်မာစစ်အစိုးရ တာဝန်ရှိသူတွေက စနေနေ့မှာပြောပါတယ်။

မစ္စတာ ကမ့်ပ်ဘဲလ် မြန်မာနိုင်ငံကို နောက်ဆုံးလာရောက်ခဲ့တာက ပြီးခဲ့တဲ့နှစ် နိုဝင်ဘာလကဖြစ်တဲ့အတွက် အခု ခရီးစဉ်ဟာ ခြောက်လအတွင်း ဒုတိယအကြိမ်မြောက် ခရီးစဉ်ဖြစ်ပါတယ်။ အမေရိကန်သမ္မတ အိုဘားမားအစိုးရက မြန်မာနိုင်ငံနဲ့ပတ်သက်ပြီး ပိတ်ဆို့အရေးယူတဲ့ မူဝါဒရော၊ တိုက်ရိုက်ဆက်ဆံတဲ့ မူဝါဒကိုပါ အသုံးပြုသွားမယ်လို့ ကြေညာခဲ့ပြီးတဲ့နောက် မြန်မာနိုင်ငံကို လာရောက်ခဲ့တဲ့ အမေရိကန်အစိုးရအဖွဲ့ထဲက အဆင့်အမြင့်ဆုံး တာဝန်ရှိသူလဲဖြစ်ပါတယ်။ အခုတကြိမ်ခရီးစဉ်ကတော့ NLD အနေနဲ့ နိုင်ငံရေးပါတီတခုအဖြစ် ဆက်ပြီး ရပ်တည်ခွင့် ကုန်ဆုံးသွားပြီးတဲ့နောက် ရက်ပိုင်းအတွင်းမှာပဲ ဖြစ်လာခဲ့တာပါ။

ဒေါ်အောင်ဆန်းစုကြည်နဲ့ NLD ပါတီကို ရွေးကောက်ပွဲဝင်လို့မရအောင် မြန်မာစစ်အစိုးရက ပိတ်ပင် ကန့်သတ်တာတွေ လုပ်ခဲ့တဲ့ အတွက် အမေရိကန်ပြည်ထောင်စုက မကြာသေးခင် ရက်တွေအတွင်း အပြင်းအထန် ဝေဖန် ပြောဆိုခဲ့ပါတယ်။

ကျင်းပမယ်ဆိုတဲ့ ရွေးကောက်ပွဲတွေမှာ အကြီးအကျယ် ချို့ယွင်းအားနည်းချက်တွေ ရှိနေပြီး မျှတမှုမရှိတာကလဲ သိပ်ကို သိသာ ထင်ရှားလွန်းတယ်လို့ အမေရိကန်နိုင်ငံခြားရေးဌာန ပြောရေးဆိုခွင့်ရှိသူ P. J. Crowley က ပြောခဲ့ပါတယ်။