ဒီ ခွေးနအဖတွေ မတရားမှုကို ထပ်ကျူးလွန်ပြန်ပြီး

ကျွန်တော် အရင်ဆုံး Request လုပ်ချင်တာက တော့ ကရင်ညီကိုမောင်မယ် များအားလုံး ခရစ်ယာန်ဘာသာဝင် ဖြစ်ဖြစ် ဗုဒ္ဒဘာသာ ဝင်ဖြစ်ဖြစ် ကိုယ်ရဲ့ ယုံကြည်ကိုးကွယ် ရာဘုရားရှင်ဆီ မှာဆုတခုကို အမြဲတမ်း တောင်းပေးပါလို့..........အပြစ်မဲ့တဲ့ ကျွန်တော်တို့ရဲ့ ကရင်လူမျိုးများ ဒီလို မတရား အစော်ကား အနိုင်ကျင့် ဖိနှိပ်ခံ ရတဲ့ဘဝ ကအမြန်ဆုံး ကင်းဝေးလွတ်မြောက်ပါစေ......သတိရတဲ့အခါတိုင်း နေရာတိုင်း အချိန်တိုင်းမှာ တောင်းပေးကြ ပါဗျာ။

ကျွန်တော် သတင်း website တွေကို လိုက်ကြည့်ရင်းနဲ့ ခေတ်ပြိုင် ဂျာနယ်မှာ သတင်းလေးတပိုဒ်ကိုဖတ် လိုက်ရတယ်.....ဖတ်ရင်းနဲ့ အင်မတန်ခံပြင်းမိတယ်....KNU ကိုတိုက်လို့မရတိုင်း ဘာမှ မဆီမဆိုင် အပြစ်မဲ့တဲ့ ကရင်လူမျိုး များကို အနိုင်ကျင့်စော်ကားနှိပ်စက် သတ်ဖြတ်တဲ့ ဒီစစ်ခွေး နအဖ တွေကို အဆုံးအစွန် နာကျည်းရွံရှာမိတယ်..ဒီလောက ကြီးမှာ လူဖြစ်ပြီးတော့ လူလိုမသိတတ်တာ ဒီအကောင်တွေပါပဲ...စိတ်ထဲမှာလည်း တနေ့ကျရင် မင်းတို့အလှည့်ရောက်ဦးမှာ ပါလို့........ဒါပေမဲ့ လတ်တလောအခြေအနေ မှာတော့ ကျွန်တော်တို့ စည်းလုံးညီညာစွာ နဲ့ အဖိနှိပ်ခံ နေရတဲ့ မိဘညီကိုမောင်နှမ များကိုအကူအညီ ပေးနိုင်မဲ့နည်းလမ်း များကို ရှာဖွေဖို့လို နေပြီ လို့ကျွန်တော်သုံးသပ်မိတယ်.....ချစ်တဲ့ညီကိုမောင်နှမ များအားလုံး အကြံအစည်ကောင်းများ နည်းလမ်း ကောင်းများ ရှိခဲ့ရင် လည်း voice out လုပ်နိုင်ပါတယ်.............................
ဆက်လက်ပြီးတော့ ခေတ်ပြိုင်ဂျာနယ် မှအောက်ပါ သတင်းကိုဖတ်ရှူ့ပါလို့............



ကရင်မိန်းကလေးငယ်များကို နအဖစစ်တပ် ပေါ်တာဆွဲဟုမွန်လူ့အခွင့်အရေးအဖွဲ့ပြော
ဝီရ/ ၆ ဇန်န၀ါရီ ၂၀၁၀


မြန်မာပြည်တောင်ပိုင်း၊ တနင်္သာရီတိုင်းရှိ နအဖစစ်တပ်က ရှေ့တန်းစစ်မျက်နှာ၌ ရိက္ခာသယ်ရန် ဒေသခံ ကရင်ရွာသားများကို ပေါ်တာဆွဲရာတွင် မိန်းကလေးငယ်များကိုလည်း ခေါ်ဆောင်နေကြောင်း မွန်လူ့အခွင့်အရေးဖောင်းဒေးရှင်း (HURFOM) က ပြောသည်။

HURFOM မှ ဆက်ဆံရေးတာဝန်ခံ နိုင်အဲမွန်က “လွန်ခဲ့တဲ့အပတ်က ရှေ့တန်းထွက်ဖို့ ပေါ်တာဆွဲခံရတဲ့ ကရင်ကျေးရွာ (၁၀) ရွာက လူ (၄၄၀) ယောက်ကို နအဖစစ်တပ် (စစ်ဆင်မှု ကွပ်ကဲရေးဌာနချုပ်) စကခ (၂၀) က ဗိုလ်မှူးကြီး သိန်းကျော်မြင့်ရဲ့ ကွပ်ကဲမှုအောက်က တပ်တွေက ခေါ်ခဲ့တယ်။ အဲဒီအထဲမှာ မိန်းကလေးငယ်တွေနဲ့ အသက် (၅၀) ကျော် အမျိုးသမီးကြီး (၁၅) ယောက်လည်း ပေါ်တာဆွဲခံရတယ်။ ခရီးက (၇) ရက်တောင် ကြာတော့ ဒီမိန်းကလေးတွေအတွက် စိုးရိမ်ရတဲ့အခြေအနေ ဖြစ်နေတယ်။ ပြီးတော့ တချို့မိန်းကလေးတွေက သူတို့အိမ်ကို အခုထိ ပြန်မရောက်သေးကြဘူး” ဟု ခေတ်ပြိုင်သို့ ပြောကြားသည်။

ပေါ်တာအထမ်းသမားအတွက် ကရင်ရွာသားများကို ပြီးခဲ့သည့် ဒီဇင်ဘာ (၂၉) ရက်၌ ခေါ်ဆောင်သွားခြင်းဖြစ်ပြီး ထီးချောင်းဝနှင့် ကင်းနီးခြံကျေးရွာမှ မိန်းကလေးများကိုလည်း ခေါ်ဆောင်သွားကြောင်း၊ တပတ်ပြည့်မြောက်ပြီးဖြစ်သော်လည်း ရွာသားအများစုမှာ နေအိမ်များသို့ ပြန်မရောက်ကြသေးကြောင်း သိရသည်။

နိုင်အဲမွန်က “အိမ်မှာ ယောက်ျားတွေက တိမ်းရှောင်သွားလို့ မိန်းကလေးတွေကို ခေါ်သွားတာ။ မလိုက်မဖြစ် လိုက်သွားရတာ။ ရွာသားတွေကို ကျည်ဆန်တွေ၊ လက်နက်တွေ မသယ်ခိုင်းဘူး။ ဆန်နဲ့ရိက္ခာတွေ သယ်ခိုင်းတာ။ ရွာသားတွေ စားသောက်ဖို့က ကိုယ်တိုင်ယူသွားရတယ်။ ပေါ်တာကြေး မရတဲ့အပြင် ကိုယ့်စရိတ်နဲ့ကိုယ် လိုက်သွားရတယ်။ အဲဒီဒေသက လူ့အခွင့်အရေး အချိုးဖောက်ခံရဆုံးဒေသ ဖြစ်နေတယ်” ဟု ပြောသည်။

အဆိုပါ အမျိုးသမီးများကို စခန်းတထောက်နားရာ မိုးရိုးကျေးရွာတွင် နောက်ဆုံးတွေ့ဆုံခဲ့ရပြီး နေအိမ်များသို့ ပြန်မရောက်ကြသေးကြောင်း ပေါ်တာဆွဲခံရသူတဦး၏ ပြောကြားချက်ကို ကိုးကား၍ HURFOM ၏ အင်တာနက်စာမျက်နှာတွင် ဖော်ပြထားသည်။

နော်တေ၊ သင်္ဘောဦး၊ သာရဝချောင်း၊ ဇင်းမာခြံ၊ ထီးချောင်းဝ၊ ပါကျင်း၊ ကျောက်လုံး၊ ကင်းနီးခြံ၊ သာမူး၊ မိုးရိုးရွာတို့မှ တရွာလျှင် ရွာသား (၃၀) မှ (၇၀) အထိ ပေါ်တာဆွဲခံကြရပြီး ထိုအရေအတွက်သည် တနင်္သာရီတိုင်းတွင် အများဆုံး ပေါ်တာအဆွဲခံရခြင်း ဖြစ်ကြောင်း HURFOM က ဖော်ပြထားသည်။

ကေအန်ယူ တပ်မှူးတဦးက “အဲဒီဒေသမှာ ၂၀၀၉ နှစ်ဆန်းပိုင်း တိုက်ပွဲဖြစ်ပွားတာ များတယ်။ အခု မိုးကုန်ချိန်ရောက်လာတော့ နအဖက ထိုးစစ်ပြန်စဖို့ ရှိတယ်။ အဲဒီမှာ ရွာသားတွေကို ပိုက်ဆံမပေးဘဲ ပေါ်တာဆွဲတာ၊ လုပ်အားပေးခိုင်းစေတာတွေနဲ့ အခြားလူ့အခွင့်အရေး ချိုးဖောက်မှုတွေကို နအဖစစ်တပ်က အမြဲကျူးလွန်နေတယ်။ အမဲရောင်နယ်မြေအဖြစ် သတ်မှတ်ပြီး ရွာသားတွေကို သတ်ဖြတ်တာတွေလည်း ရှိတယ်။ ပေါ်တာသမားတွေကို ထွက်ပြေးတယ်လို့ အကြောင်းပြပြီး သတ်လိုက်တာလည်း ရှိတယ်” ဟု ပြောကြားသည်။

အဆိုပါဒေသသည် ထားဝယ်ခရိုင်အတွင်းရှိ ကေအန်ယူ တပ်မဟာ(၄) ထိန်းချုပ်ရာဒေသဖြစ်ပြီး ၁၉၉၇ ခုနှစ်မှစ၍ ကျေးရွာပေါင်း (၁၅) ရွာကို မြန်မာစစ်တပ်က မီးရှို့ဖျက်ဆီးခဲ့ပြီး ကျန်ရှိသည့် ရွာ (၁၀) ရွာကျော်ကို အတင်းအဓမ္မ ရွှေ့ပြောင်းခိုင်းခဲ့သည်။